У Дуброўна сакавік пачаўся з прыгажосці

Сакавік у культурным жыцці Дубровеншчыны пачаўся з традыцыйнага і вельмі прыгожага святочнага мерапрыемства “Беларусачка -2019”. Падчас конкурснай праграмы журы і гледачы павінны былі вызначыць самую шчырую і таленавітую дзяўчынку-падлетка.
За ганаровае званне спаборнічалі пяць прадстаўніц раёна: Дзіяна Голубева са Станіславова, Ганна Бондарева са Сваташыц і дубровенкі Ганна Самуйлава, Алена Голешава, Наталля Каравіка.

Па шляху да перамогі дзяўчынкам трэба было прайсці шэраг іспытаў. Арганізатары конкурснай праграмы зрабілі ўсё, каб гледачы ў поўнай меры атрымалі эстэтычную і эмацыянальную асалоду ад сустрэчы з кемлівымі, артыстычнымі, улюбленымі ў сваю маленькую радзіму дзяўчынкамі.
Раз-пораз яны здзіўлялі веданнем роднай мовы, уменнем імправізіраваць, пераўвасабляцца, стаўленнем да гісторыі сваіх населеных пунктаў і да лёсу краіны цалкам.

Так, вельмі яскравай была візітоўка “Мая радзіма” Ганны Самуйлавай. З асобым пачуццём удзячнасці і захаплення яна распавяла пра сваю школу, сям’ю і любімыя куточкі Дуброўна. Дарэчы, у Ганны была амаль самая моцная група падтрымкі з гледачоў. Гэтым балельшчыкам мала ў чым саступала і група падтрымкі Ганны Бондаравай. Выступленне гэтай удзельніцы ў конкурсе-экспромце “Размаўляй са мной па-беларуску” было пранята пяшчотай да роднай зямлі.

У конкурсе “Мае таленты” самымі запамінальнымі былі Дзіяна Голубева і Наталля Каравіка. Дзіяна прадставіла вельмі арыгінальную замалеўку-танец, у якой выканала ролю самавара.
А Наталля прачытала верш, прысвечаны 75-годдзю вызвалення Рэспублікі Беларусь, які яна напісала сама.
Вельмі цікава прайшоў конкрс “Беларускія стравы”.

Дзяўчынкі павінны былі не толькі прыгатаваць страву да аднаго з народных свят, але і прадставіць яе. Так, Алена Голешава прыгатавала бліны да Масленіцы і прапанавала сяброўкам пагадаць на блінах: ў залежнасці ад таго, чым былі начынены бліны, дзяўчат чакала прадказанне лёса.

Яшчэ раз заўважу, што праграма была пабудавана так, што для гледача гэта выглядала, як звычайны тэматычны канцэрт. Уражанне падмацоўвала яшчэ і тое, што ў некаторых конкурсах дзяўчаты паказвалі сумесныя нумары. Гэта тычыцца конкурсу “Харэаграфічная замалёўка на мелодыі песень ваенных гадоў” і конкурс-дефіле “Прыгажуня”.
Журы доўга падводзіла вынікі, а ў глядзельнай зале вызначылі, хто заслужыў “Прыз сімпатыі гледачоў”.
Падарункі ад райкама “БРСМ” атрымалі ўсе ўдзельніцы конкурсу. Ганна Бондарава была адзначана прызам РА РГА “Белая Русь”.

Так атрымалася, што вынікі прафесійнага журы і меркаванне гледачоў саўпалі —
тытул “Беларусачка-2019” і “Прыз сімпатыі гледачоў” атрымала Ганна Самуйлава.
Алена КАРСАКОВА
Фота аўтара