Как ведётся подготовка к отопительному сезону в Дубровенском районе

Каб зімой было цёпла ў доме

Дырэктар Дубровенскага філіяла абласнога ўнітарнага прадпрыемства “Віцебскаблтоп” Анатоль Сяргеевіч Выбарны паведаміў, што іх арганізацыя забяспечвае палівам прыкладна 22 працэнты прыватных домаўладанняў, да якіх не падведзены прыродны газ. Отпуск і дастаўка паліва насельніцтву ажыццяўляецца згодна з чаргой. У горадзе Дуброўна на чаргу для атрымання паліва ставяць пасля прадастаўлення з ЖКГ даведкі аб складзе сям’і і патрэбнасці грамадзяніна ў цвёрдым відзе паліва. Тым домаўладанням, да якіх падключаны прыродны газ, паліва па даціруемых з бюджэту цэнах, не адпускаецца. Яны яго могуць набыць толькі па поўнаму кошту. Сельскіх жыхароў ставяць у чаргу на атрыманне паліва сельскія Саветы, якія дастаўляюць талоны на паліва ў Дубровенскі філіял.

А.С.Выбарны і вядучы эканаміст арганізацыі Антаніна Фёдараўна Дзмітровіч паведамілі, што пастаўкі торфабрыкету з заводаў-вытворцаў сёлета ідуць з некаторым апераджэннем графіка. Так, пры плане на першае паўгоддзе 2500 тон торфабрыкету Дубровенскаму філіялу “Віцебскаблтоп” за 6 месяцаў пастаўлена 2904 тоны. Выконвае графік паставак дроў УП “Віцебсклес”, а вось Аршанскі лясгас у першым паўгоддзі не выканаў свае абавязацельствы па пастаўках дроў: пры плане 1500 кубаметраў Дубровенскаму філіялу выдзелена 1153 кубаметры.

Тым не менш, як і ў мінулыя гады, існуе чарга на атрыманне паліва, даціруемага з бюджэту. Як паведаміла А.Ф.Дзмітровіч, па стану на 1 ліпеня ў чарзе на атрыманне брыкету стаяла 743 чалавекі, дроў — 281 чалавек. За першае паўгоддзе філіял забяспечыў торфабрыкетам 594 домаўладанні, дравамі — 211.
На 100 працэнтаў выкананы заяўкі на пастаўку торфабрыкету льготнай катэгорыі грамадзян, а дровамі — на 90 працэнтаў (не выкананы пакуль толькі тры заяўкі на пастаўку дроў).

Сёння работнікі Дубровенскага філіяла УП “Віцебскаблтоп” ставяць домаўладальнікаў на чаргу для атрымання торфабрыкету на снежань, а дроў — на кастрычнік.
А.С.Выбарны паведаміў такую навіну: з 18 ліпеня згодна з рашэннем Віцебскага аблвыканкама значна ўзраслі цэны на паліва. Так, калі да апошняга часу 1 тона брыкету па льготнай цане для насельніцтва каштавала 122 тысячы рублёў, то цяпер — 148,6 тысяч рублёў, дроў адпаведна 40 і 48,7 тысячы рублёў. Па сённяшніх цэнах за 4,5 тоны брыкету, якія адпускаюцца па норме, неабходна заплаціць 668 тысяч рублёў. А калі ўлічыць кошт пагрузкі і дастаўкі брыкету транспартам Дубровенскага філіяла, то за машыну брыкету, скажам, жыхару аграгарадка Ляды сёння неабходна заплаціць каля 1 мільёна рублёў. Гэта нямала. Вялікую ўдзельную вагу тут займае кошт дастаўкі паліва, асабліва для сельскіх жыхароў аддаленых вёсак.

Як паведаміў А.С.Выбарны, у калектыўных дагаворах нямногіх гаспадарак прадугледжана такая льгота для добрасуменных работнікаў, як выдзяленне транспарту для дастаўкі паліва.

Выдзяляюць, па словах А.С.Выбарнага аўтатранспарт для дастаўкі брыкету сваім работнікам ААТ “Гігант-Агра”, “Усход-Чырына”, КУСГП імя Чарняхоўскага, некаторай катэгорыі работнікаў КУСГП “Арловічы”.

Ёсць магчымасць у жыхароў раёна весці нарыхтоўку дроў ўласнымі сіламі.

Аб гэтым нашаму карэспандэнту паведаміў ляснічы Дубровенскага лясніцтва Уладзімір Рыгоравіч Свішчоў.

—Нарыхтоўка дроў вядзецца ва ўсіх лясных масівах раёна, — гаворыць У.Р.Свішчоў. — У сельскіх жыхароў большасці вёсак ёсць магчымасць запасціся дровамі на зіму з ляснога масіва, які размешчаны ў непасрэднай блізасці ад населенага пункта, дзе яны жывуць. Пры гэтым не трэба прад’яўляць ніякіх даведак. Дастаткова вусна звярнуцца да работнікаў лясной гаспадаркі, якія працуюць у тым ці іншым масіве Дубровенскага, Кляноўскага і Асінторфскага лясніцтваў, з просьбай аб выдзяленні дроў. Дровы лясніцтвы адпускаюць у гатовым выглядзе з прамежкавых складаў у лесе.

У.Р.Свішчоў таксама паведаміў, што з 18 ліпеня павысіліся цэны на дровы, нарыхтоўваемыя ў лясніцтвах. Так, 1 кубаметр дроў, даўжынёй 2 метры, з бярозы, дуба, ясеня, лісвеніцы цяпер каштуе 26,2 тысячы рублёў; хвоі і алешніка — 25 тысяч рублёў; ёлкі, асіны, таполя, ліпы — 19,5 тысячы рублёў. Гэта цэны на дровы, якія складзены ў лесе і грамадзянам трэба самім паклапаціцца аб іх дастаўцы дамоў. Лясніцтвы таксама аказваюць паслугі па дастаўцы дроў насельніцтву, але іх магчымасці абмежаваныя. Таму трэба вывозіць дровы ўласным транспартам, ці звяртацца ў арганізацыі. Бухгалтар Дубровенскага лясніцтва Ніна Міхайлаўна Жыўрэня паведаміла, што ў лясніцтва штодзень звяртаюцца людзі з просьбай аб выдзяленні дроў. За першае паўгоддзе толькі гэтае лясніцтва адпусціла насельніцт-ву 526,4 кубаметры дроў. Такую ж работу праводзяць і іншыя лясніцтвы, якія размешчаны на тэрыторыі раёна.
—Ці ёсць абмежаванні ў аб’ёме нарыхтоўкі дроў уласнымі сіламі? — пацікавіўся я ў У.Р.Свішчова.
—Такія нормы не ўстаноўлены. Нашы работнікі выдзяляюць столькі дроў, колькі просіць грамадзянін.
Такім чынам, у насельніцтва ёсць два варыянты назапашвання паліва: купляць яго ў Дубровенскім філіяле “Віцебскаблтоп” ці ў лясніцтвах, якія размешчаны на тэрыторыі раёна.
Андрэй КВІР.