Выбираем рецепт вкусной творожной пасхи и румяного кулича

Галоўнае свята

Самы галоўны дзень царкоўнага календара — дзень Светлага Уваскрэсення Хрыстова.

Усе мы ведаем некаторыя агульныя правілы і традыцыі, звязаныя са святкаваннем Вялікадня. Большасць з нас пякуць кулічы, робяць тварожную пасху, фарбуюць яйкі. Чаму ж менавіта гэтыя стравы ставяць на святочны велікодны стол?

Тварожная пасха

Традыцыйна форма пасхі — усечаная піраміда. Па адной версіі сімвалізуе магілу, у якой здзейсніўся цуд Увасрэсення, па другой — гару Галгофу. На верхнім баку пасхі павінны быць літары “ХУ”. Яны азначаюць “Хрысток уваскрэсе”. З бакоў пасачніцы (формы) па традыцыі робяць выявы крыжа, кап’я, палкі, а таксама парасткаў, якія сімвалізуюць пакуты і ўваскрэсенне Іісуса Хрыста.

Пасха “Усім дабра і здароўя”

800 г тварагу, 200 г масла, 2 шк. цукру, 200 г смятаны, 2 яйкі, па палавіне чайнай лыжкі солі і ванільнага цукру, 0,5 шк. разынак (изюм).

Змяшайце ўсе інгрэдыенты і ўзбівайце венчыкам 30 хвілін. Масу выкладзіце ў чыстую марлю, закруціце вузлом, пакладзіце ў форму (а калі яе няма — у салатнік з конусападобным дном), зверху пастаўце невялікі цяжар і пакіньце на суткі ў халадзільніку. Затым марлю акуратна раскруціце, перакуліце пасху на плоскае блюда і зніміце марлю. Упрыгожце пасху на свой густ — шакаладнымі фігуркамі, цукатамі, кавалачкамі садавіны ці кансерваванымі ягадамі.

Куліч

Згодна са старадаўнім паданнем, Гасподзь пасля свайго Уваскрэсення прыходзіў да апосталаў падчас іх трапезы. Сярэдняе месца заставалася незанятым, у сярэдзіне стала ляжаў прызначаны яму хлеб. Так з’явілася традыцыя на Вяліка-дзень пакідаць хлеб у храме. Гэты хлеб называўся артас. Яго пакідалі на асобным стале, на працягу ўсяго Светлага тыдня абносілі пад час хрэснага ходу, а ў суботу пасля блаславення раздавалі вернікам. Паступова з’явіўся звычай мець свой артас. Ім стаў куліч (ад грэча-скага “круглы хлеб”). Гэтая страва на нашым стале сведчыць пра нябачную прысутнасць уваскрэслага Госпада побач.

Лімонны куліч з міндалем і разынкамі (“ізюмом”)

1 кг мукі, 0,5 л малака, 5 яек, 300 г масла, цэдра 1 лімона, 100 г міндалю, 150 г разынак (изюм), 50 г дражджэй, 1 шк. цукру, соль.

У невялікай колькасці цёплага малака развядзіце дрожджы, дадайце 2 ч. лыжкі цукру і пастаўце ў цёплае месца падыходзіць. У малако, якое засталося, усыпце муку, дабаўце рошчыну, старанна перамяшайце, прыкрыйце ручніком, пастаўце зноў у цёплае месца для пад’ёму. Затым дадайце ўзбітыя з цукрам жаўткі, растопленае масла, натаркаваную цэдру лімона, здроблены міндаль, прамытыя і прасушаныя разынкі, соль. У апошнюю чаргу рухамі зверху ўніз увядзіце ўзбітыя бялкі і акуратна замясіце цеста. Выкладзіце яго ў добра змазаную маслам форму (не да верху), дайце падняцца, змажце зверху жаўтком, пасыпце міндалем і выпякайце да гатоўнасці.

Куліч “Асаблівы”

1л малака, 300 г масла, 200 г маргарыну, 1 шк. смятаны, 0,5 шк. алею, 100 г свежых дражджэй, 10 яек, 1 кг цукру, мука, ванілін, соль, разынка. Для глазуры: 1 бялок, 1 шк. цукровай пудры, кандытарская пасыпка.

Злучыце шклянку малака, дрожджы, па 1 ст. лыжцы цукру і мукі, пакіньце на 30 хвілін. Яйкі ўзбіце, цукар развядзіце ў малацэ, якое засталося, растапіце масла і маргарын, крыху астудзіце. Усё злучыце, дадайце смятану і столькі мукі, каб атрымалася цеста, як на аладкі. Пакіньце на дзве гадзіны ў цёплым месцы. Затым падмясіце астатнюю муку, ванілін, зноў добра перамяшайце, дайце падняцца. Цеста выкладзіце ў змазаную алеем форму, напоўніце на 1/3 аб’ёму, дайце яшчэ раз падняцца. Выпякайце 30-60 хвілін пры тэмпературы 180 С (у залежнасці ад памеру куліча). Бялок узбіце з цукровай пудрай, змажце кулічы, упрыгожце кандытарскай пасыпкай.