Областная программа «Витагро» подарит Дубровенщине 7 новых зерносушильных комплексов

Згодна з абласной праграмай “Вітагра” у нашым раёне ў новай пяцігодцы плануецца пабудаваць 7 новых збожжасушыльных комплексаў магутнасцю дапрацоўкі збожжа 30 тон у гадзіну. Аб тым, што будзе зроблена ў гэтым годзе па ўзвядзенню новых збожжасушылак, наш карэспандэнт папрасіў расказаць начальніка вытворчага аддзела райсельгасупраўлення Уладзіміра Мікалаевіча Анішчанку.

—Сёлета да пачатку ўборкі ўраджаю плануецца здаць у эксплуатацыю два збожжасушыльныя комплексы ЗСК-30Ш-Ж у КУСГП “Прыдняпроўскі” і ААТ “Баброва-Агра”, — гаворыць Уладзімір Мікалаевіч Анішчанка. — У камунальным сельгаспрадпрыемстве “Прыдняпроўскі” яшчэ ў мінулым годзе заклалі падмурак пад збожжасушылку, завезлі частку металаканструкцый. Праўда, нядаўна высветлілася, што з-за памылкі праекціроўшчыкаў не заліты падмурак пад паветрапровад. Гэтую работу трэба будзе выканаць цяпер. Як толькі падмурак будзе гатовы, спецыялісты Ціраспальскай ПМК або завода-вытворцы збожжасушылак “Амкадор” прыступяць да мантажу збожжасушыльнага комплексу.

Для вырабу праектнай дакументацыі і закладкі падмурка збожжасушылкі ў ААТ “Баброва-Агра” ў гэтым годзе было выдзелена 262 мільёны рублёў. Праектная дакументацыя ўжо выраблена, будаўнікі ПМК-53 прыступілі да заліўкі падмурку. Перад імі пастаўлена задача завяршыць гэтыя работы да 15 мая. Потым да работы прыступяць мантажнікі. Плануецца закончыць мантаж збожжасушылак да 15 чэрвеня. Праўда, для таго, каб мантажнікі прыступілі да работы, гаспадаркі павінны заплаціць першы ўзнос у суме 69 мільёнаў рублёў. Поўны кошт збожжасушыльнага комплексу ЗСК-30Ш-Ж складае 1,2 мільярда рублёў.

Хоць і не прадугледжана планам, але ў гэтым годзе, магчыма, пачнецца будаўніцтва новай збожжасушылкі ў ААТ “Каманіна”. Гэтай гаспадарцы ўжо выдзелены 262 мільёны рублёў для падрыхтоўкі праектнай дакументацыі і закладкі падмурку. Цяпер рыхтуюцца зыходныя дадзеныя для вырабу праектнай дакументацыі.

Андрэй КВІР