Дубровенские молодожёны создают сосуд счастья

Як у Дуброўна вяселле спраўлялі?або Сучаснае вяселле па-беларуску

Загс – фатаграфаванне – застолле… Менавіта так сёння многім з нас уяўляецца сучаснае вяселле. Аднак, як паказвае практыка, апошнім часам маладыя ўсё часцей выказваюць жаданне праводзіць рэгістрацыю шлюбу згодна са старадаўнімі традыцыямі беларускага вяселля.

Запамінальнай для многіх жыхароў і гасцей г.Дуброўна стала шлюбная цырымонія Аляксея і Ганны Васілеўскіх, якія спраўлялі вяселле па арыгінальным сцэнарыі падчас правядзення абласнога конкурса вясельных абрадаў Віцебшчыны “Вялікая вясельніца – 2012”.
Сонечным суботнім днём пры ўваходзе ў ЗАГС жаніха і нявесту з вясельным караваем сустракалі удзельнікі фальклорнага калектыва “Кудзеліца”. Затым адбылася рэгістрацыя шлюбу, падчас якой маладыя абмяняліся заручальнымі пярсцёнкамі. Далей вясельны экіпаж накіраваўся да раённага Дома рамёстваў.

Тут Ганна і Аляксей прымалі ўдзел у вырабе “посуда шчасця” – глінянага збана, упрыгожанага чырвоным поясам, які сімвалізуе надзейнага абаронцу сям’і. Таксама ў гэты дзень дубровенскія майстры падарылі маладым яшчэ аднаго ахоўніка – “Неразлучнікаў”, якія ўяўляюць сабой фігуркі мужчыны і жанчыны, зробленных з ільнянога валакна з адной агульнай рукой.

Згодна з народным павер’ем, менавіта так, рука аб руку пойдуць па жыцці муж і жонка.
Гісторыя пачуцця Ганны і Аляксей пачалася чатыры гады назад. Сустрэліся маладыя ў вёсцы Ляхаўка (на малой радзіме Аляксея), куды Ганна пасля заканчэння УА “Беларуска-Расійскі ўніверсітэт” у Магілёве прыехала па размеркаванні працаваць бухгалтарам. І вось праз чатыры гады сяброўства, сёлета яны вырашылі афіцыйна аформіць свае адносіны.

—Для нас стварэнне сям’і – гэта вельмі адказны і важны крок, – прызнаецца Аляксей. – А таму невыпадкова, што сыграць вяселле мы вырашылі толькі цяпер. На працягу некалькіх гадоў я займаўся будаваннем кватэры. І вось, нарэшце, сёння ўсё гатова для нашага шчаслівага сямейнага жыцця.

У хуткім часе пасля вяселля Аляксей і Ганна пераехалі ў Горкі. Аляксей працягвае працаваць будаўніком, а Ганна пакуль што актыўна займаецца ўладкаваннем быта.
Мы яшчэ раз віншуем маладых і жадаем ім шчасця, паразумення і мудрасці ў сямейным жыцці.
Вікторыя АЛЯКСАНДРАВА.