Эрнест Ялугин посетил Дубровенщину
Нядаўна ў раёне пабываў беларускі пісьменнік, наш зямляк Эрнэст Ялугін, які наведаў сваю малую радзіму — вёску Асінаўка, пабываў у Будскай сярэдняй школе, сустрэўся з навучэнцамі гарадскіх школ. Сустрэча з пісьменнікам у Дуброўне проходзіла ў дзіцячай школе мастацтваў, на яе, акрамя вучняў, сабраліся настаўнікі, бібліятэкары, члены рабочай групы па стварэнні музея, усе, хто цікавяцца творчасцю Э.В.Ялугіна.
Размову са сваімі чытачамі Эрнэст Ялугін вёў на роднай беларускай мове. Апавядаючы пра сабе, адзначыў, што Дубровеншчына назаўсёды застанецца ў яго сэрцы вобразам малой радзімы. Яго бацькі прымалі ўдзел у будаўніцтве Асінбуда: бацька, Васіль Мартынавіч, працаваў механікам, маці Ніна Дзмітраўна — на будаўніцтве. Перад вайной сям’я Ялугіных пераехала ў Оршу: бацька быў назначаны кіраўніком аднаго з аршанскіх прадпрыемстваў. Творчую дзейнасць Эрнэст Ялугін пачаў у Мсціслаўлі, працуючы ў раённай газеце. Першым яго творам была аповесць “Камяні Млечнага шляху”, у якой ён апавядаў пра сваё дзяцінства, пра ўсё тое, што яму, хлапчуку, прыйшлося перажыць у часы вайны.
Эрнэсту Ялугіну належыць многа твораў: некаторыя з іх былі прадстаўлены на імправізаванай выставе ў зале, дзе адбывалася сустрэча.
Кніга Ялугіна “Мсціслаўскі посах” лічыцца сапраўдным беларускім бестсэлерам, у ёй — гісторыя Беларусі.
Яго пяру належаць аповесць “Без эпітафіі”, зборнікі нарысаў ”Салёная планета”, раманы, прысвечаныя рэвалюцыйным падзеям у Алжыры, якія маюць назву “Астравы”, “Алжырская пастка”. Самыя буйныя творы Эрнэста Ялугіна прысвечаны гісторыі і драматычным падзеям Вялікага Княства Літоўскага — “Ідзі і кажы”, “А потым рай”, “Перад патопам”, яму належаць эсэ (роздум) “Рой чалавечы”, “Нармандскі след”, “Убачыць Мсціслаўца”.
Вучні з цікавасцю слухалі аповед пісьменніка пра сучасную літаратуру, пра яго сустрэчы і сяброўства з Рыгорам Барадуліным, Васілём Быкавым, Уладзімірам Караткевічам, адказы на пытанні, якія датычыліся адносін да беларускай мовы і літаратуры, выкарыстання інтэрнэт-рэсурсаў у пазнанні інфармацыйнай прасторы, прасілі аўтографы на памяць аб сустрэчы.
Начальнік аддзела ідэалагічнай работы, культуры і па справах моладзі Л.А.Дударава шчыра падзякавала Э.В.Ялугіну за тое, што ён знайшоў час для сустрэчы, за яго цікавы аповед і ўручыла Эрнэсту Васільевічу сувеніры, вырабленыя рукамі майстроў Дома рамёстваў — гліняны гарлачык з эмблемай дубровенскага брэнда — фестывалю “Дняпроўскія галасы ў Дуброўне” і пояс-абярэг, які, па народным паданні, ахоўвае ад розных нягод і напасцяў. Дырэктар раённай бібліятэчнай сістэмы Н.Фарэйтарава прыпаднесла госцю штодзённік, каб у яго ён запісваў свае думкі, тэмы, вобразы герояў сваіх новых твораў.
Лідзія ЧАПЯЛОВА.
Фота аўтара.
