Встреча единомышленников
Сустрэўшыся на ХХІІ Міжнародным фестывалі песні і музыкі Падняпроўя Расіі, Беларусі і Украіны “Дняпроўскія галасы ў Дуброўне”, Вольга Аляксеева і Святлана Платунова адразу ж знайшлі агульную мову. Падчас той сустрэчы кіраўнік народнага клуба “Дубрава” коратка расказала новай знаёмай аб справах і работах калег і аднадумцаў, прадэманстравала шэраг работ членаў клуба, якія меліся на выставачных стэндах песеннага фэсту ў Дуброўне, і запрасіла С.Платунову яшчэ раз прыехаць у Дуброўна, пагасціць у Доме рамёстваў, дзе Святлана Мікалаеўна магла б сустрэцца з дубровенцамі, якія захапляюцца шыццём з лапікаў.
І вось днямі работнікі Дома рамёстваў гасцінна сустрэлі члена Беларускага саюза майстроў народнай творчасці, майстра шыцця з лапікаў С.М.Платунову. кіраўнік народнага клуба майстроў “Дубрава” Вольга Аляксеева падрабязна расказала пра здабыткі і планы гэтага творчага аб’яднання, паведаміла пра таленавітых землякоў, паказала ўзнагароды, якімі адзначаны дубровенцы на розных рэгіянальных, абласных і рэспубліканскіх конкурсах і выставах.
Вольга Сяргееўна заўважыла, што на Дубровеншчыне некалькі дзесяткаў жанчын розных узростаў захапляюцца ныццём з лапікаў. У прыватнасці, яна нагадала работы Клаўдзіі Гарэлікавай, якія пастаянна экспануюцца на абласных і раённых выставах, адначасова прадэманстравала адну з работ К.Р.Гарэлікавай — коўдру з лапікаў — якая пастаянна знаходзіцца ў Доме рамёстваў.
Потым да майстроў народнай творчасці з Дуброўна звярнулася С.М.Платунова. Яна расказала аб цесных сувязях з майстрамі лапікавага шыцця са старажытнага Полацка, аб іх сумесных работах і выставах. Член Беларускага саюза майстроў народнай творчасці прадэманстравала шэраг сваіх работ: дыванчыкі, паясы, шляпкі, бусы, кулоны, сурвэткі, лялечкі-пярсцёнкі і інш. Яшчэ большую колькасць работ С.М.Платуновай майстры народнай творчасці Дуброўна пабачылі ў інтэрнеце.
Шмат пытанняў да майстра лапікавага шыцця С.Платуновай было ў народнага майстра, былой настаўніцы сярэдняй школы №1 Наталлі Дзеравяшка. Яна паказала госці з Мінска свае новыя распрацоўкі і работы з джынсавай тканіны, якія атрымалі высокую адзнаку. Падчас заканчэння гэтай цікавай сустрэчы ў Доме рамёстваў майстар шыцця з абрэзкаў дала карысныя парады народным умельцам з Дуброўна, як працаваць з тканінай, падарыла жадаючым наборы рознакаляровых абрэзкаў, якія сама выкарыстоўвае ў аўтарскіх праектах.
Леанід ДУДАРАЎ,
