Дубровенский Дом ремесел отпраздновал юбилей
На сам рэч колераў, якімі карыстаюцца майстры раённага Дома рамёстваў, нашмат больш, але сем, як мы ведаем з фальклору, чароўная лічба, якая дапамагае рабіць нешта добрае, выніковае і патрэбнае ў жыцці. Менавіта гэта робяць творчыя людзі Дубровенскага раёна, якія складаюць калектыў Дома рамёстваў, вывучаючы, захоўваючы і распаўсюджваючы сакрэты народных рамёстваў.
У гэтым мы яшчэ раз пераканаліся, наведаўшы адкрыццё вставы «Дом, дзе жыве рамяство», якая прысвечана 20-годдзю з дня ўтварэння Дубровенскага раённага Дома рамёстваў.
Выставачная зала раённага гісторыка-краязнаўчага музея пераўтварылася ў цудоўны куфэрак, дзе кожнаму жадаючаму прапаноўваюць пазнаёміцца з сапраўдным скарбам — рэчамі народнага побыту, якія выраблены ў наш час па старадаўніх традыцыях. На адкрыццё выставы прыйшлі людзі розных пакаленняў і цікава было назіраць, калі старэйшыя ўзгадвалі хаты сваіх бабуль і адзначалі, што такія жбанкі ці посцілкі былі ў іх дзяцінстве звычайнай з’явай.
Арганізатары выставы нагадалі прысутным, што адраджэнне народных рамёстваў пачалося ў нашым раёне ў 1998 годзе, калі метадыст РДК Зоя Сімуціна заснавала клуб «Дубрава». З яго ўдзельнікаў у 2004 годзе быў створаны калектыў Дома рамёстваў. Усё пачыналася з трох напрамкаў народнага мастацтва: саломапляцення, ткацтва, лапікавага шыцця. У 2005 з’явілася кераміка, лозапляценне, разьба па дрэве.
На сённяшні дзень у Доме рамёстваў 7 відаў мастацкіх рамёстваў (вышыўка, ткацтва, кераміка, лапікавае шыццё, вязанне, саломапляценне, лозапляценне) — вось яны сем колераў натхнення.
Майстры, якія стаялі ў пачатку існавання Дома рамёстваў змаглі перадаць сваю апантанасць маладому пакаленню.
Зоя Сімуціна распрацавала ўласныя ўзоры саламяных павукоў, зрабіла арыгінальную калекцыю саламяных і льняных лялек. Аднавіла расасенскі велікодны «павук», які ўвайшоў у Дзяржаўны спіс гісторыка-культурных каштоўнасцей Рэспублікі Беларусь. Зараз яе справу працягвае Аксана Раўковіч, якая валодае не толькі многімі тэхнікамі саломапляцення, але і тэхнікай размалёўкі тканін, стварае маляванкі.
Справу выраба лялек працягнула Святлана Дземянкова: яе Дубравушка стала сімвалам нашага раёна. Майстар валодае тэхнікай лапікавага шыцця, яна аднавіла некалькі беларускіх традыцыйных коўдр у гэтай тэхніцы.
Людміла Чарвінская — адна з першых майстроў, якая занялася аднаўленнем марачоўскай цацкі- свістулькі. Дзякуючы актыўнай рабоце народнага майстра Беларусі Вольгі Аляксеевай дубровенская цацка-свістулька ўнесена ў Дзяржаўны спіс гісторыка-культурных каштоўнасцей Рэспублікі Беларусь. Зараз Вольга Сяргееўна — кіраўнік студыі народных мастацкіх рамёстваў «Дубрава», якая аб’ядноўвае 21 майстра. Яны адраджаюць вытворчасць традыцыйнай дубровенскай керамікі, вывучаюць старадаўнія спосабы апрацоўкі гліны.
Таццяна Дробат стаяла ля вытокаў аднаўлення традыцыйнай дубровенскай вопраткі — строю. Яе справу спацягваюць майстар па ткацтву Алена Капытоўская і вышывальшчыца Надзея Кускова.
На выставе прадстаўлены цікавыя вырабы Галіны Давыдзенка, якая стварае дэкаратыўныя цацкі, і карункі Іны Лаўрэнюк. Арганічна ўлілася ў калектыў малады спецыяліст Лізавета Ардзюк, майстар па лозапляценні.
Як і патрэбна на дні нараджэння, на адкрыцці выставы гучалі добрыя словы віншаванняў і падзякі за вялікую работу, якую праводзяць майстры Дома рамёстваў ад калег і былых супрацоўнікаў. Так, загадчык сектара культуры райвыканкама Алена Якавенка перадала калектыву-юбіляру Ганаровую грамату ўпраўлення культуры Віцебскага абласнога выканаўчага камітэта.
Прывітальны адрас депутата Палаты прадстаўнікоў Нацыянальнага сходу Рэспублікі Беларусь Уладзіміра Бабічава зачытала дырэктар РДК Вікторыя Храмцова.
Намеснік старшыні Дубровенскага райвыканкама, старшыня РА РГА «Белая Русь» Святлана Рыжанская адзначыла:
— Вы робіце вельмі патрэбную справу — захаванне нашага непаўторнага народнага мастацтва для нашчадкаў. Гэта нашы карані, гэта наш скарб. На мерапрыемствах рознага ўзроўню я з гонарам назіраю, што вырабы нашых майстроў карыстаюцца цікавасцю, яны ўражваюць і нагадваюць аб тым, хто мы і адкуль.
Жадаю вам натхнення, цікавых здабыткаў і развіцця майстэрства, — пажадала Святлана Рыжанская і ўручыла маладому загадчыку Дома рамёстваў Анастасіі Рудзь Падзяку Дубровенскага раённага выканаўчага камітэта за значны ўклад у развіццё і прапаганду нацыянальнай культуры і мастацтва, актыўны ўдзел у грамадскім жыцці раёна.
