Усё лепшае — беларускае

Менавіта такую назву мае выстава, якая працуе ў Доме ўрада ў Мінску. Арганізацыя выстаўкі ініцыіравана пярвічнай арганізацыяй РГА «Белая Русь» Палаты прадстаўнікоў сумесна з мясцовымі выканаўчымі і распарадчымі органамі, суб’ектамі грамадзянскай супольнасці.

2024 год аб’яўлены кіраўніком дзяржавы Годам якасці. Гэтае рашэнне прынята ў мэтах далейшага павышэння якасці жыцця беларускага народа, забеспячэння канкурэнтаздольнасці нацыянальнай эканомікі на сусветнай арэне, стымулявання ініцыятывы, фарміравання ў грамадстве адказнасці за вынікі сваёй працы і пачуцця дачынення да будучыні краіны.

Асаблівая ўвага на выставе ўдзяляецца грамадзянскім ініцыятывам, рэалізацыя якіх ажыццяўлялася за кошт сродкаў рэспубліканскага і мясцовых бюджэтаў, паколькі менавіта такім чынам людзі бачаць вынікі свайго ўдзелу ў паляпшэнні якасці свайго жыцця, сваіх блізкіх, раёна, горада і краіны ў цэлым. На выставе таксама прадстаўлены дасягненні ў галіне якасці прадпрыемстваў, арганізацый незалежна ад формы ўласнасці і галіновай прына­лежнасці, перспектыўныя праекты, накіраваныя на павышэнне якасці.

«Тут прадстаўлены і грамадзянскія ініцыятывы, і самая высакаякасная прадукцыя прадпрыемстваў рэгіёнаў. Выстава дазволіла нам яшчэ лепш пазнаёміцца з кожным рэгіёнам, з людзьмі, якія іх прадстаўлялі. Разам з прадстаўнікамі выканаўчай улады, кіраўнікамі, рэктарамі вну ў яе адкрыцці прынялі ўдзел і маладыя людзі, якія працуюць у гэтых працоўных калектывах, вучацца ў навучальных установах. Гэта сведчыць аб тым, што існуе пераемнасць пакаленняў», — адзначыў старшыня Палаты прадстаўнікоў Ігар Сяргеенка.

Як падкрэсліваюць арга­нізатары выставы, Беларусь на міжнароднай арэне пазіцыянуецца як краіна, якая выпускае высакаякасную прадукцыю. Невыпадкова кіраўніком дзяржавы бягучы год аб’яўлены Годам якасці. Але самае важнае, каб кожны чалавек адчуваў сваю датычнасць да таго, як ён жыве і які можа быць яго ўдзел у жыцці нашай Беларусі.

Выстава нагадвае, што якасць жыцця беларусаў залежыць не толькі ад вытворцаў, але і ад кожнага грамадзяніна паасобку.

Выставачную экспазіцыю брэндаў  Віцебскай вобласці прадставіў намеснік старшы­ні Віцебскага аблвыканкама Вячаслаў Дурноў. Галоўны крытэрый высокай якасці айчыннай прадукцыі — гэта экспарт тавараў і паслуг, які пастаянна расце, а таксама пазнавальнасць прадукцыі.

У бягучым годзе прадукцыя прадпрыемстваў Віцебшчыны экспартуецца ў 77 краін. Забяспечаны рост продажаў металапракату, піламатэрыялаў, кабельнай прадукцыі, тканін ільняных, сыроў, рыбных прэсерваў, мяса птушкі, малака і вяршкоў згушчаных і сухіх. Захаваны асноўныя рынкі збыту ў краіны СНД, Азіі. Экспарт у Кітай павялічыўся ў 1,6 раза. Пастаўкі ў краіны Афрыкі ўзраслі ў 7,6 раза.

Віцебскімі вытворцамі асвоены новыя рынкі — Эсваціні, Паўночная Македонія, Гана, Саудаўская Аравія, Туніс і іншыя. Пастаўкі ў Расію ўзраслі на 17,6 працэнта.

У структуры экспарту найбольшую долю складаюць пастаўкі прадуктаў харчавання — звыш 27 працэнтаў, машын, абсталявання — 22 працэнты, звыш 12 працэнтаў — тэкстыльныя вырабы і абутак, 10 працэнтаў — палімерныя вырабы, 8 працэнтаў — металавырабы.