Главные колядовщики Дубровенщины собрались в Калиновке

На базе Калінаўскага сельскага Дома культуры быў праведзены “Калядны фэст”, які сабраў поўную залу гледачоў. У ім прынялі ўдзел народны ансамбль народнай песні “Калінаўскія маладзіцы”, члены дзіцячага ўзорнага аматарскага аб’яднання “Глыбінка”, якое дзейнічае пры Калінаўскім СДК, і народны фальклорны калектыў “Кудзеліца”.

Пра асаблівасці сёлетняга каляднага фэсту рэдакцыі паведаміў дырэктар Цэнтра народнай творчасці і культурна-досугавай дзейнасці Уладзімір БАБІЧАЎ. —Беларуская народная культура спалучае ў сабе традыцыі язычніцтва і хрысціянства і такім чынам дае нам магчымасць пазнаёміцца з унікальнымі звычаямі і абрадамі нашых продкаў. Самыя пашанотныя ў нашага народа святы — старажытнаславянскія Каляды і Ражджаство Хрыстова.

Галоўнымі персанажамі на іх ва ўсе часы былі пераапранутыя ў персанажаў народных казак і паданняў калядоўшчыкі , якія з песнямі ходзяць па вуліцы, заходзяць у хаты, дзе забаўляюць гаспадароў сваімі жартамі, гульнямі, весялосцю, жадаюць ім усяго найлепшага ў новым годзе, а тыя шчодра адорваюць іх гасцінцамі.

Калядны фэст мы правялі ўжо ў другі раз. Летась ён праходзіў на базе раённага Дома культуры, сёлета мы вырашылі правесці яго ў сельскай мясцовасці. Калядны фэст 2016 года набыў новыя абрысы і быў не падобны на папярэдні сваёй асаблівай сакраментальнасцю і таямнічасцю.

Удзельнікі фэсту не проста прадэманстравалі аўтэнтычныя традыцыі калядавання ў нашай мясцовасці, але і пастараліся прыцягнуць да ўдзелу ў іх моладзь, — гаворыць Уладзімір Бабічаў.

Калядоўшчыкі — удзельнікі народнага фальклорнага калектыву “Кудзеліца” з песнямі пад гармонік прайшлі па цэнтральнай вуліцы аграгарадка Калінаўка, пабывалі ў доме пенсіянеркі, былога галоўнага эканаміста саўгаса імя Чарняхоўскага Л.Я. Макаёвай, павіншавалі яе з Калядамі і Ражджаством Хрыстовым і парадавалі сваім выступленнем.

На сцэне Калінаўскага СДК быў прадэманстраваны абрад святкавання Каляд у гэтай мясцовасці, у выкананні якога былі задзейнічаны дарослыя і дзеці з аграгарадка Калінаўка.
Лідзія ЧАПЯЛОВА.