На полях Дубровенщины продолжает кипеть работа

Механізатары льнозавода за гэтыя дні закруцілі трасту ў рулоны на плошчы 125 гектараў і нарыхтавалі звыш 400 тон ільносыравіны, а 447 тон яе даставілі пад шохі льнозавода. Усяго ж з пачатку ўборкі вадзіцелі льнозавода даставілі пад шохі прадпрыемства 6494 тоны трасты або ў пераводзе 2165 тон ільновалакна. Гэта на 400 тон трасты ці на 155 тон ільновалакна больш, чым было нарыхтавана ў мінулым годзе з усёй плошчы. А яшчэ на палетках завода траста ляжыць у стужках на 110 гектарах і значная колькасць у рулонах. Каб выканаць дзяржзаказ па пастаўках ільновалакна членам мехатрада льнозавода па стану на 18 кастрычніка заставалася даставіць пад шохі каля 300 тон трасты. Відавочна, за чацвер і пятніцу, калі стаяла сухое надвор’е, яны з гэтай задачай справіліся.
Завяршылі ўборку трасты льнаводы ААТ “Якубава-Агра”. На льнозавод дастаўлена 550 тон сыравіны і дзяржзаказ па пастаўках ільновалакна выкананы на 113 працэнтаў.
Па стану на 18 кастрычніка ў цэлым па раёне траста яшчэ ляжала ў стужках на 254 гектарах, у тым ліку на палетках ільносеючых гаспадарак на 144 гектарах.
Пры спрыяльных умовах надвор’я гэта на некалькі дзён работы.

Нядаўна ў нашым раёне здадзены ў эксплуатацыю яшчэ два новыя збожжасушыльныя комплексы ЗСК-30Ш-Ж вытворчасці ААТ “Лідсельмаш”. Такія магутныя збожжасушылкі пабудаваны ў КУСГП “Зарубы” і ў ААТ “Каманіна”.
Як паведаміў дырэктар КУСГП “Зарубы” Аляксандр Зайцаў, новы збожжасушыльны комплекс ужо апрабаваны ў рабоце: дасушана да кандыцыі і ачышчана ад прымесяў каля 250 тон збожжа.
У завяршальнай стадыі будаўніцтва новай збожжасушылкі “Лідсельмаш” у ААТ “Якубава-Агра”. Мантаж абсталявання ўжо завершаны. Засталося толькі падключыць энергасістэмы. Па словах начальніка вытворчага аддзела райсельгасупраўлення Уладзіміра Анішчанкі, гэтыя работы плануецца завяршыць да 1 лістапада гэтага года.
Такім чынам, у гэтым годзе ў нашым раёне пабудавана шэсць новых збожжасушыльных комплексаў “Лідсельмаша”. Акрамя вышэйназваных гаспадарак такія сушылкі ў сёлетняе жніво былі здадзены ў эксплуатацыю ў КУСГП імя Чарняхоўскага, “Першамайскае” і ААТ “Прыдубровенскае”.
Нагадаем, што ў мінулым годзе былі пабудаваны збожжасушылкі вытворчасці “Амкадор” у КУСГП “Пры-дняпроўскі” і ААТ “Баброва-Агра”, а некалькі гадоў назад магутны збожжасушыльны комплекс “Лідсельмаша” быў узведзены ў ААТ “Усход-Чырына”.
Словам, у дзевяці гаспадарках раёна праблема пасляўборачнай дапрацоўкі збожжа ў асноўным вырашана. Плануецца, што ў будучым годзе будаўніцтва новых збожжасушыльных комплексаў у нашым раёне будзе працягнута.
А.КВIР