На Дубровенщине тракторы заменяют на чудо-агрегаты «Двина» и «Роса»

Сёлетняй вясной хлебаробы раёна пераканаліся ў высокай эфектыўнасці самаходнага агрэгата для ўнясення вадкіх мінеральных угнаенняў “Дзвіна”, які вырабляе ААТ “Верхнядзвінскі райаграсэрвіс”. Хоць ужо заканчваецца красавік, але з-за пераўвільготненасці глебы на палеткі азімых збожжавых і рапсу можна ўз’ехаць толькі на агрэгатах “Дзвіна” і “Раса”, якія абсталяваны пнеўмашынамі, у той час як трактары з апырсквальнікамі правальваюцца.

Як працуе “Дзвіна” я бачыў на палетках азімага рапсу ў ААТ “Каманіна”. Для таго, каб сфатаграфаваць механізатара райаграсэрвісу Аляксандра Уладзіміравіча Бугаёва, які працуе на агрэгаце, мне давялося ісці некалькі дзесяткаў метраў па пасевах рапсу. Ногі вязлі ў сырой глебе, у той жа час на месцы, дзе толькі што прайшоў агрэгат “Дзвіна” заставаўся ледзве прыкметны след ад пнеўмашын.

—На якой плошчы можна падкарміць азімыя з дапамогай такой машыны? — цікаўлюся ў механізатара.

—Калі спрыяе надвор’е і справа ладзіцца, дык на 150 гектарах можна ўнесці ўгнаенні, — гаворыць механізатар. — Шырыня апрацоўкі за адзін праход 20 метраў. Тэмпы стрымлівае толькі тое, што вельмі часта даво-дзіцца запраўляць агрэгат угнаеннямі. Зрабіўшы круг на полі трэба зноў заліваць КАС.

У размове з механізатарам высветлілася, што “Дзвіна” — эканамічная машына: для запраўкі 1 гектара тукамі расходуецца ўсяго 300 грамаў бензіну. Пазней мне давялося высветліць, што трактар МТЗ-82 у агрэгаце з прычапным апырсквальнікам для ўнясення угнаенняў на такой плошчы расходуе 1,2 кілаграма дызельнага паліва, або ў чатыры разы больш, чым “Дзвіна”.

Факты сведчаць, што сёлета ў склаўшыхся ўмовах агрэгат “Дзвіна” з’яўляецца сапраўднай палачкай-выручалачкай для хлебаробаў. Такіх агрэгатаў у раёне чатыры: два — у райаграсэрвісе і па аднаму маюць СГФ імя Ю.Смірнова і КУСГП “Зарубы”. Менавіта яны і робяць “надвор’е” на падкормцы азімых культур. Напрыклад, толькі Аляксандр Уладзіміравіч Бугаёў з райаграсэрвіса падкарміў азімыя збожжавыя (па стану на 26 красавіка) на 1580 гектарах.

Больш за 900 гектараў на такім агрэгаце падкарміў азімых Юрый Пятровіч Валевіч з СГФ імя Ю.Смірнова, звыш 750 гектараў — Леанід Іванавіч Лукашоў з КУСГП “Зарубы”.

Усяго ў раёне па стану на 26 красавіка агрэгатамі “Дзвіна” азімыя збожжавыя і рапс былі падкормлены амаль на 5000 гектарах, у той чак, як верталетам — на 1500 гектарах. Прычым сабекошт падкормкі азімых культур агрэгатам “Дзвіна” значна ніжэйшы, чым верталетам. А па-другое і якасць ўнясення угнаенняў з дапамогай “Дзвіны”, якая працуе з навігатарам, значна вышэй, чым верталётам.

Напрошваецца вывад: для таго, каб вясной без праблем падкармліваць азімыя культуры і шматгадовыя травы і пашы практычна ў кожнай гаспадарцы неабходна мець агрэгат “Дзвіна” ці “Раса” на пнеўмашынах. Дарэчы, агрэгат “Раса” аршанскай фірмы “Белросаграсэрвіс” у гэтыя дні працуе на азімых палетках КУСГП “Арловічы” і, па словах спецыялістаў, вызначаецца яшчэ большай эфектыўнасцю, чым “Дзвіна”.

Андрэй КВІР
Фота аўтара